O xurado do Premio da Crítica Galicia de iniciativas culturais acordou conceder ao Arquivo do Reino de Galicia a súa distinción pola súa importante renovación e polo seu traballo de difusión dos fondos documentais galegos.
Os Premios da Crítica de Galicia foron convocados desde 1978 polo Círculo Ourensán Vigués. En 1992 faise cargo deles a Fundación Premios da Crítica. Concédense en varias modalidades: creación literaria, ensaio e pensamento, investigación, música, ciencias e artes da representación e iniciativas culturais. Dende 1993 outórgase tamén a distinción de Galego egrexio a unha personalidade caracterizada por manter ao longo da súa vida un firme compromiso coa cultura galega.
Outros premiados este ano:
· Soño da febre de Miguel Anxo Murado foi a mellor obra literaria.
· De provincia a nación de Xusto Beramendi viuse recoñecido no apartado de investigación.
· O falecido Xaime Quessada levou o premio de Ciencias e Artes.
· Arte e Parte de Xurxo Borrazás impúxose na categoría de pensamento e ensaio.
· A Colección “A Tiracolo” de Ouvirmos gañou o premio da música.