O xoves 17 de abril no marco do 26º Salón Internacional do Cómic de Barcelona terá lugar a presentación oficial do “Grupo Comicteca” formado por un grupo de bibliotecarios de toda España e Portugal que traballan en centros con especial interese no mundo do TBO. O grupo Comicteca, formado por bibliotecas de toda España (A Coruña, Barcelona, Lisboa, Zaragoza, Pamplona, Cádiz, etc.) quere aproveitar o evento de cómic máis importante de España para presentar os seus obxectivos ante compañeiros, profesionais e creadores asociados ao cómic. Os nosos obxectivo céntrase en dar resposta desde a biblioteca pública ao enorme interese social que está xerando o cómic e pretendemos facelo a través de reivindicar a presenza do cómic na biblioteca pública, fomentar a formación dos bibliotecarios neste ámbito, desenvolver recursos e experiencias e, por suposto, difundilas a través de distintos medios. Unha vez que presentemos noso “documento constitucional” divulgarémolo todo o posible por se tivésedes interese nesta experiencia profesional á que desde xa vos invitamos a participar a través da nosa lista de distribución http://groups.google.es/group/comicteca . Desde Galicia iremos dous bibliotecarios das Bibliotecas Municipais da Coruña como fundadores do grupo para participar na mesa pero quero insistir en que somos un grupo aberto e esperámosvos en Barcelona o 17 de abril ás 12:30 h na sala de conferencias do Salón Internacional de Cómic de Barcelona. Por suposto tamén intentaremos estar presentes no próximo Congreso Nacional de Bibliotecas Públicas da Coruña.

Julio Pesquero